Na tujhey mileiN na mujhey mileiN.......!!


AasmaaN sey inaayaetiN na tujhey mileiN na mujhey mileiN
mohabbatoN sey raahateiN na tujhey mileiN na mujhey mileiN

hameiN aashiqi meiN sach mila hameiN zindagi meiN sab mila
magar be'wafaai ki aadateiN na tujhey mileiN na mujhey mileiN

udhar tu duwa meiN laga raha idhar meiN duwa meiN laga raha
par mannatoN sey haajateiN na tujhey mileiN na mujhey mileiN

thi aarzu kabhi saahiloN pe terey saath saath hum chal sakeiN
par samandaroN sey ijazateiN na tujhey mileiN na mujhey mileiN

jis zindagi ki khaahishoN meiN so rat'jagoN meiN sajood keeye….
us zindagi ki bashaarateiN na tujhey mileiN na mujhey mileiN……

hasratoN ke deeyoN ko aag kabhi tu ney di kabhi meiN ney di
magar roshni ki alaamateiN na tujhey mileiN na mujhey mileiN

na to terey dard rukey kaheeN na merey zakhm bharey kabhi
sabar-o-shukar ki haalateiN na tujhey mileiN na mujhey mileiN

teri manzileiN kahein aur theiN meri manzileiN kaheiN aur theiN
kisi aek simt ki musafateiN na tujhey mileiN na mujhey mileiN

tu tthear gaya kisi aur ke ghar meiN ruk gaya kisi aur ke dar
man-pasand si chaahateiN na tujhey mileiN na mujhey mileiN

hamaari pur'khaloos neeyatoN sey manzileiN kiuN chin gaeiN!
muqaddaroN sey wazahateiN na tujhey mileiN na mujhey mileiN....!!!

0 comments :

Post a Comment

Related Posts Plugin for WordPress, Blogger...